急劲的奔流打在溪旁的磐石上，激起一片沸腾白瀑。
水流激荡而充满力量，磐石坚实，稳如泰山，
双方合演了一场千古以来‘激与稳’的对抗，奏出大自然中永不停止的流水曲。
在涌急瀑流之中，湿漉磐石之上，却依然有第三者无视急流的冲击，
悠然自得地享受潺潺流水的洗礼。
牠们便是香港溪涧生物中主流成员之一的海南卷螺。
找不到文献资料解释牠们为何会在急流中聚集，
急流中的石面藻类也不见得特别丰富，而成为牠们聚集的原因。
个人估计是牠们利用急流冲刷掉贝壳上的寄生藻及其他寄生物，
换言之，这里可能是牠们的大众澡堂，沐浴之余也可社交一番。
海南卷螺凭著坚硬外壳保护，及不太拣择的摄食习性，
在缺少大型掠食者的清澈溪流中，成功的世代繁衍，成为最常见的溪流生物之一。
海南卷螺平时也会在平静的水中活动。
以下便是另一溪涧一处平静水面观察时，听到螺母和小螺仔的对话：
螺仔：‘妈，我同朋友仔出去玩喇！’
螺母：‘玩时玩，小心Ｄ呀！如果见到类似研究生的人，要避开佢地呀。’
螺仔：‘点解呀？唔通佢地会捉我地嚟食？’
螺母：‘唔系，听闻某大学开左个研究题目，话将新界部份海南卷螺同广东米虾捉去香港岛部份隔离的溪流，做生物移居实验呀。’
螺仔：‘咦，都好㖞，我都未去过香港岛，去果边住下都好㖞！’
螺母：‘傻仔，如果净系捉左你去，咁你就以后咪见唔到阿妈咯。’
螺仔：‘系㖞。咁香港岛冇我地Ｄ亲戚嘅咩？’
螺母：‘好似话冇哂㖞，原因系旧底香港岛曾经用油喷洒溪流灭蚊，搞到好多溪流物种死哂。’
螺仔：‘咁点解要拣我地同广东米虾做实验呀？’
螺母：‘因为新界同大屿山都有我地族群，証明我地都系本地原生种，而且我地对其他溪流生物威胁不大，
唔会搞乱哂生态平衡，同埋，我地因为有个大壳，方便研究人员做标签记录㖞。’
螺仔：‘咁如果知实验成功之后又点呢？’
螺母：‘咁可能就会试下将一Ｄ香港已野外绝种，但仍然有在人工环境中繁殖的鱼，例如唐鱼，
即系白云金丝鱼野放，令生境回复更多元化物种。’
螺仔：‘咁咪好咯，我自愿申请做先头部队得唔得？’
螺母：‘做实验品㖞，你估玩呀家下？而且呢个只系一个研究课题，都唔知开始进行未，
你打电话去问下，或者7月24日去港大个公开讲座问下Professor David Dudgeon。’
螺仔：‘吓，我唔识英文㖞，算啦，我去玩喇。’
螺母：‘除左Ｄ研究生，仲要小心Ｄ海南沼虾啊！’
螺仔：‘怕乜啫，大家‘海南’字头，唔会食左我啩。况且我有个壳保护。’
螺母：‘傻仔，你有个壳仔，佢地亦有两只长钳。好似我咁大只就唔使怕佢地，
但系你地咁细只螺仔就要小心，根据一项调查，在一只海南沼虾肠道中竟然就有74只海南卷螺，
即系话佢地系好钟意捉D细螺仔食架！’
螺仔：‘吓！唔怪得寻日小明又唔见左喇，唔通．．．’
螺母：‘小明冇事，佢在等你呀，嗱，记住，如果见到海南沼虾，就要黐实小明呀。’
螺仔：‘小明成个孱仔咁，佢都唔够海南沼虾打架？’
螺母：‘就系贪佢够孱，咁只虾紧系舍难取易，先捉佢嚟食，咁你咪剩机逃走咯！’
螺仔：‘阿妈，你．．．’
小明：‘螺仔，快Ｄ行啦，等你好耐喇！’
File
海南卷螺 Freshwater Snail
学名：Brotia hainanensis
腹足纲(Gastropoda)前腮亚纲(Prosobranchia ) 锥蜷科(Thiaridae) 川卷螺属(Brotia)
